Светлана Радзивил

Уйда вақтни бефойда сарфламаслик керак. Масалан, бирон бир қизиқарли нарсани мутолаа қилиш ёки бошқа қизиқарли нарани ўрганиш мумкин. Сизга бу борада ёрдам беришига ҳаракат қиламиз. Бугун Ўзбекистон Республикасида хизмат кўрсатган спортчи Светлана Радзивилнинг профессионал йўли ҳақида ҳикоя қилиб беришга қарор қилдик!

Светлана енгил атлетиканинг баландликка сакраш йўналишига ихтисослашган ўзбекистонлик спортчимиздир.

У енгил атлетикадаги фаолиятини кўпкураш билан шуғулланишдан бошлаган ва бу йўналишда кўплаб мусобақаларда қатнашган. Кейинчалик эса баландликка сакраш билан астойдил шуғуллана бошлади.

Унинг биринчи йирик старти 2002 йилда Кингстонда ўтган ўсмирлар ўртасидаги жаҳон чемпионати бўлиб, унда ўзбекистонлик спортчи 1,70 метрга сакраб, 19-ўринни эгаллайди. Халқаро миқёсдаги биринчи муваффақияти эса 2004 йилда ўсмирлар ўртасидаги Осиё чемпионатидаги кумуш медалига тўғри келади.

Светлана 19 ёшида бир мавсум ичида учта йирик мусобақанинг олтин медаль соҳибасига айланди. Булар ёпиқ иншоотлардаги Осиё чемпионати, ўсмирлар ўртасидаги қитъа ва жаҳон чемпионатларидир. Бу даврда у аллақачон 1.90 метр баландликни забт этиб улгурди.

Радзивил 2010 йил Осиё ўйинларида 1,95 баландлик билан ғолиб бўлган. 2011 йил ҳамюртимиз Осиё чемпионатида кумуш медални қўлга киритди ва жаҳон чемпионатида саккизинчи бўлди. Шунингдек, у 2014 йилда ёпиқ иншоотлардаги Осиё чемпионатида юқори натижаларни кўрсатди – 1.96 метр (ёпиқ иншоотлардаги шахсий рекорд). Бу натижа билан ҳамюртимиз Осиё чемпионати ғолибга айланди.

2018 йилга келиб эса, Светлана Осиё ўйинларининг уч карра чемпионига айланди. Шу билан бирга ҳамюртимиз мусобақа рекордини ҳам янгилади – 1.96 метр.

Светлана Радзивил халқаро турнирлардаги ғалаба ва медаллар шодасидан ташқари давлат мукофотларини ҳам қўлга киритган:
• «Шуҳрат» медали (2007),
• «Дўстлик» ордени (2013),
• Ўзбекистон Республикасида хизмат кўрсатган спортчи (2019).

Спортчимизнинг ҳаёти ва фаолиятидан хабардор бўлиш учун унинг Инстаграм саҳифасига обуна бўлинг: https://www.instagram.com/svetlana__87/

   

 

Манба

Поделиться 2020-05-14 19:00:48