ЕЧЛ гуруҳ босқичи юлдузларидан яна бири Германия чемпионатига ўтди

Загребнинг «Динамо» клуби яримҳимоячиси Дани Ольмо «РБ Лейпциг» аъзосига айланди. Немислар клуби 21 ёшли ҳавбек трансферини тасдиқлади, у билан 2024 йил ёзига қадар шартнома тузилган.

 

Аввалроқ «Лейпциг» испаниялик футболчи учун 30 млн евро тўлаши ҳақида айтилганди. Бонуслар ҳисобига бу сумма 45 миллион еврогача етиши мумкин.

Ольмонинг сотуви «Динамо» ва бутун хорват футболи тарихидаги рекорд трансферга айланди.

Немислар клуби ушбу футболчи учун курашда «Милан», «Вулверҳэмптон» ва «Барселона»ни ортда қолдирди. Маълумот учун, ҳавбек каталонияликлар клуби тарбияланувчиси ҳисобланади.

«Эспаньол» ва «Барселона» клублари академияларидаги таҳсилдан кейин у ўйин амалиётига эга бўлиш учун 2014 йилда Загребнинг «Динамо» клубига йўл олган. Техникаси кучли, юқори тезликка ва кучли зарбага эга бўлган бу яримҳимоячи 2018 йилда Хорватиянинг энг яхши футболчиси сифатида эътироф этилганди. Жорий мавсумда эса у ўзини жаҳонга танитди, ЕЧЛ гуруҳ босқичида «Сити» дарвозасига йўллаган голидан кейин уни топ-клублар кўз остига олиб қўйди, қолаверса Испания терма жамоасига илк марта чақирув олди. Хорватия чемпионатида 9 ўйинда 3 гол ва 3 голли узатмага, Чемпионлар лигасида эса 5 гол ва 4 голли узатмага (саралаш босқичи қўшиб ҳисобланганда) муаллифлик қилган футболчи йил якунларига кўра Хорватия чемпионатидаги энг яхши ёш футболчи ва энг яхши футболчи сифатида тақдирланди.

 

Манба

Поделиться 2020-01-27 12:37:58